Arnór fram­lengir til 2028: „Vil sjá hversu langt við getum farið“

Arnór tók við Holstebro fyrir tveimur árum og hefur gert góða hluti með liðið síðan þá. 

Á síðasta tímabili komst Holstebro í undanúrslit úrslitakeppninnar og Arnór var í kjölfarið valinn þjálfari ársins í Danmörku.

„Við erum ekki búnir. Það eru tækifæri til að gera meira. Ég vil sjá hversu langt við getum farið en við þurfum allar hendur á dekk í þessari vegferð,“ sagði Arnór við undirritun samningsins.

„Fyrstu tvö tímabilin mín þróuðumst við frábærlega en ég sé enn meiri möguleika hjá félaginu. Við verðum að bæta okkur á hverjum degi og freista þess að ná árangri. Ég sé möguleika til að ná stærri markmiðum en áður og vona að allir séu klárir í þá vegferð.“

Arnór, sem er 41 árs, lauk leikmannaferlinum með Álaborg og var svo aðstoðarþjálfari liðsins um fimm ára skeið, eða þar til hann tók við Holstebro. Hann þjálfaði einnig yngri landslið Danmerkur.

Auk þess að þjálfa Holstebro er Arnór aðstoðarþjálfari íslenska karlalandsliðsins og hefur verið síðan Snorri Steinn Guðjónsson var ráðinn þjálfari þess.

Jóhannes Berg Andrason leikur með Holstebro sem hefur unnið tvo af fyrstu þremur leikjum sínum í dönsku úrvalsdeildinni.