Leikirnir eftir tvískiptingu: Skagamenn fara á Ísafjörð, til Akureyrar og Eyja

Ingvi Þór Sæmundsson skrifar 17. september 2025 11:31

Ómar Björn Stefánsson og félagar í ÍA eru aðeins tveimur stigum frá öruggu sæti eftir að hafa unnið síðustu tvo leiki sína. vísir/diego

Leikjadagskrá tvískiptingarinnar í Bestu deild karla liggur nú fyrir. Fyrsta umferðin hefst á sunnudaginn en keppni í Bestu deildinni lýkur sunnudaginn 26. október.

Á mánudaginn réðist endanlega hvaða lið verða í efri og neðri hlutanum fyrir tvískiptinguna.

ÍA, sem hefur unnið tvo leiki í röð, þarf að fara í þrjú löng ferðalög næstu vikurnar en liðið mætir Vestra, ÍBV og KA á útivelli. ÍA á aftur móti heimaleiki gegn KR og Aftureldingu.

KR-ingar eru í 10. sæti deildarinnar með 24 stig, tveimur stigum á undan Skagamönnum og þremur á undan Mosfellingum. KR fær heimaleiki gegn Aftureldingu og ÍBV en útileiki gegn KA, ÍA og Vestra í lokaumferðinni.

Tvö efstu lið deildarinnar sem stendur, Víkingur og Valur, mætast í lokaumferðinni. Á síðasta tímabili fengum við hreinan úrslitaleik um Íslandsmeistaratitilinn milli Víkings og Breiðabliks. Blikar unnu hann, 0-3, og urðu þar með Íslandsmeistarar í þriðja sinn.

Stjarnan hefur verið góðri siglingu að undanförnu og FH hefur sömuleiðis gengið vel síðustu vikur.vísir/ernir

Stjarnan er heitasta lið deildarinnar en Garðbæingar hafa unnið fimm leiki í röð. Þeir eru með fjörutíu stig, jafn mörg og Valsmenn en tveimur stigum minna en Víkingar.

Stjarnan fær heimaleiki gegn FH, Víkingi og Breiðabliki í lokaumferðinni. Stjörnumenn mæta hins vegar Valsmönnum og Frömurum á útivelli.

FH, sem er taplaust á heimavelli í sumar, fær Breiðablik og Fram í heimsókn en mætir Stjörnunni, Víkingi og Val á útivelli.