Getur verið vand­ræða­legt að byrja allt í einu að syngja í Krónunni

Í kaffispjalli um helgar er rætt við fólk í ólíkum störfum. Við spyrjum alltaf um það hvenær fólk vaknar á morgnana, hvað er það fyrsta sem það gerir þá og hvenær fer fólk að sofa. Við spyrjum líka um skipulagið og helstu verkefnin í vinnunni.

Hvenær vaknar þú á morgnana?

„Vakna yfirleitt um sjö, stilli klukkuna um hálfátta en er oftast vöknuð áður og tilbúin í daginn.“

Hvað er það fyrsta sem þú gerir á morgnana?

„Fyrsta sem ég geri á morgnanna er að kveikja á útvarpinu, Bítið á Bylgjunni og hella uppá einn rótsterkann kaffibolla. Svo er það sturtan til að fríska sig ennþá meira áður en ég vek börnin. 

Ef tíminn er mér hliðhollur næ ég að svara nokkrum tölvupóstum í rólegheitum.“

Ertu ein þeirra sem syngur í sturtu, í bílnum eða annars staðar?

Svarið er einfalt og það er já. 

Syng öllum stundum, alls staðar og stundum án þess að átta mig á því. Sem getur verið vandræðalegt eins og til dæmis í Krónunni, kannski er það samt meira raul en söngur beint. 

Var einu sinni spurð af vinkonu dóttur minnar hvort ég væri söngkona, sem mér þótti mjög fyndið þar sem hæfileikinn er langt frá því að vera til staðar.“

Í hvaða verkefni ertu að vinna helst í þessa dagana?

„Ásamt hinum daglega rekstri þá er jólaundirbúningurinn nú á fullu hjá okkur í Meba. Má segja að hann hafi byrjað strax eftir sumarfrí í ágúst og nær hámarki núna í oktober og nóvember. Jólin eru okkar aðal sölutími eða árstíð þannig ekkert má klikka. Erum að panta inn vörur og koma þeim fram í verslunina, þurfum líka að ganga úr skugga að allar umbúðir verði komnar á réttum tíma og verslunin sé falleg og með vel framsettum vörum.

Netverslun tekur líka mikið pláss og er alltaf að færast í aukana, vöruúrvalið þar stækkar með hverjum deginum.

Þar sem opnunartími eykst líka um jólin þá þurfum við einnig að passa upp á að verslanirnar séu vel mannaðar og allir sáttir með sínar vaktir. Það er eitt risastórt pússluspil. Markmiðið er að verslunin sé tilbúin þegar einn skemmtilegasti tími ársins í verslun hefst um miðjan nóvember.

En ásamt þessum verkefnum reyni að gefa mér tíma við hönnun og smíðar. Þar næ ég ákveðinn slökun og sköpunin fær 100% athygli.“

Hvernig skipuleggur þú þig í vinnu?

„Er svolítið gamaldags þegar kemur að því og notast við dagbók eða meira svona stílabók sem ég punkta niður í og svo hjálpar google calander mér mikið. Dagurinn er alltaf þétt setinn, sem getur þó breyst mjög hratt þar sem ég vinn í mjög lifandi og skemmtilegu umhverfi.“

Hvenær ferðu að sofa á kvöldin?

„Það er mjög misjafnt og markmiðið er alltaf að fara uppí um ellefu

En það er samt eiginlega ómöguleg að svara þessu með einum tíma þar sem ég hef af og til verið komin upp í og sofnuð hálfníu með sex ára dóttur minni. 

En oftar en ekki vinn ég best á kvöldin þegar komin er ró á heimilið, hvort sem það er að brjóta saman þvott eða eitthvað vinnutengt. Þannig kannski má segja að ellefu sé meðaltalið.“