Hvað þýðir „six-seven“?

Frasinn hefur yfirleitt enga sérstaka merkingu. Sumir tengja hann við hæð, aðrir nota hann sem innantómt grín, en margir segja hann einfaldlega til að taka þátt í vinsælu TikTok-trendi. Skortur á merkingu frasans virðist hafa gert hann sveigjanlegan og auðvelt að nota hvar sem er, þar sem krakkar finna sér hvaða ástæðu sem er til að hrópa hann út og hlæja.

Sumir hafa notað frasann til að lýsa einhverju sem „nokkuð gott“ eða „svona la-la“, en oft er það einfaldlega sagt vegna þess að það hljómar fyndið.

Notkunin rauk upp með haustinu

Á vef Forbes segir að samkvæmt greiningum samfélagsmiðilsins TikTok hafi verið birtar meira en tvær milljónir færslna með myllumerkinu #67. 

Notkunin rauk sérstaklega upp í september og október þegar skólarnir hófust á ný þar sem brandarinn fylgdi nemendum inn í kennslustofurnar.

Þar segir að fjöldi kennara sé orðinn langþreyttur á frasanum og sumir hafa jafnvel bannað hann í kennslustofunni. Aðrir nýta hann sem tæki til að halda aga og ná athygli nemenda, til dæmis með stærðfræðiprófum þar sem öll svörin eru „67.“

Merkingarleysi ástæða vinsældanna

Samkvæmt Wall Street Journal má rekja uppruna frasans til lagsins „Doot Doot (6 7)“ eftir rapparann Skrilla frá árinu 2024. 

Í laginu syngur Skrilla „6-7, I just bipped right on the highway“, og það hefur síðan þá verið notað sem bakgrunnshljóð í mörgum TikTok-myndböndum. Hann segir frasann í raun merkingarlausan sem sé einmitt ástæðan fyrir vinsældunum.

Nýtt viðurnefni NBA-leikmanns

Trendið breiddist hratt út og fór að sjást í fjölmiðlum og á samfélagsmiðlum þegar NBA-leikmaðurinn LaMelo Ball, sem er sex fet og sjö tommur á hæð, sem samsvarar 2,01 metrum á hæð, varð tengdur við frasann.

Tengingin kom eftir að drengur að nafni Maverick Trevillion hrópaði „six-seven“ í myndavél á körfuboltaleik á meðan hann hreyfði lófana upp og niður. Myndbandið fór fljótt á flug og birtist í ótal TikTok-útgáfum tengdum trendinu.

Fyrrnefnt lag Skrilla fékk sömuleiðis aukna dreifingu fyrr á árinu þegar fjöldi notenda birti TikTok-myndbönd af LaMelo Ball við lagið. Ball hefur sjálfur sagt í viðtali við ESPN að hann heyri oft krakka hrópa „six-seven“ að sér og grínaðist með að þetta sé nýja viðurnefnið hans.

Fleiri TikTok myndbönd af athæfinu má sjá hér að neðan.