Glæsi­legir forystuhrútar á Syðra – Velli í Flóa

Hér erum við að tala um sauðina tvo hjá Jóni Gunnþóri, bónda á Syðra – Velli í Flóahreppi, sem komu í Reykjaréttir í haust eftir að hafa verið á fjalli. Báðir eru þeir mjög gæfir og eru báðir undir sömu forystuánni, sem heitir Tign og er frá Gróustöðum í Gilsfirði.

Þeir eru svakalega fallegir og vel hyrndir hjá þér Jón?

„Já, já, þeir eru vanhyrndir þess vegna eru þeir svona glæsilegir“, segir Jón.

En fyrir þá sem vita ekki, hvað eru sauðir, hvað þýðir það á mannamáli?

„Geltir hrútar, það er ekki flóknara en það“.

Jón Gunnþór segist eingöngu vera að rækta forystusauðina til gamans og sér til yndisauka í fjárbúskapnum en hann er annars með rúmlega 100 fjár á fóðrum í vetur.

„Sá eldri er fimm vetra og sá yngri fjögurra, þetta eru hálfbræður.Höfði heitir sá eldri og Greifi sá yngri“, segir Jón er hann er líka með nokkrar forystuær.

Jón Gunnþór segir mjög gaman og gefandi að vera sauðfjárbóndi og að vera að rækta íslensku sauðkindina.

„Jú, jú, til þess er maður að þessu“.

Þú ert mikill rollukarl?

„Já, já,  ætli það megi ekki segja það.“