„Að­eins öðru­vísi handbolti“

„Þær spila óhefðbundinn handbolta. Þegar við horfum á taktíkina hjá þeim þá er hellingur í gangi, alls konar árásir sem við þurfum að passa mjög vel“ segir landsliðsþjálfarinn Arnar Pétursson um andstæðing dagsins.

Úrúgvæ hefur ekki riðið feitum hesti á þessu móti. Fyrsti leikurinn gegn Serbíu tapaðist með 12 mörkum og næsti leikur gegn Þýskalandi með 26 marka mun.

Arnar líkir úrúgvæska liðinu við annað lið frá Suður-Ameríku sem Ísland mætti á síðasta HM, sá leikur vannst örugglega með sex mörkum þrátt fyrir frekar slakan sóknarleik hjá stelpunum okkar.

„Þetta er ekki ósvipað dæmi og gegn Paragvæ fyrir tveimur árum, þetta er aðeins öðruvísi handbolti og við þurfum að vera undir það búin… Þær eru líka þrælsterkar þegar þær ná að stilla upp í vörn, þannig að við þurfum að undirbúa margt en þetta er leikur sem við höfum horft svolítið í og ætlum okkur að vinna“ sagði Arnar en viðtalið má sjá í spilaranum hér fyrir neðan. 

Leikur Íslands og Úrúgvæ hefst klukkan 14:30 og verður í beinni textalýsingu á Vísi.