Andrea snýr heim í Olís-deildina

Samningur Andreu tekur gildi næsta sumar og er til tveggja ára. Þessi frábæra landsliðsskytta kemur til ÍBV frá einu allra besta liði Þýskalands, Blomberg Lippe, þar sem hún hefur spilað síðustu ár.

Andrea, sem er 27 ára, er uppalin hjá Fjölni en hélt þaðan til Kristianstad árið 2018 og lék þar í fjögur ár, eða þar til hún hélt til Danmerkur og spilaði í Álaborg og Silkeborg. Hún hélt svo til Blomberg-Lippe og hefur spilað þar frá árinu 2024.

Andrea hefur verið landsliðskona um árabil og spilað 66 landsleiki og skorað 116 landsliðsmörk fyrir Ísland. Hún missti þó af HM í desember síðastliðnum eftir að hafa slitið liðband í ökkla en er komin á fulla ferð eftir þau meiðsli.

Ljóst er að Andrea mun styrkja lið ÍBV mikið en Eyjakonur eru þó nú þegar í næstefsta sæti Olís-deildarinnar, aðeins tveimur stigum á eftir toppliði Vals.