Sig­valdi sneri aftur eftir stutt stopp á EM

Hornamaðurinn Sigvaldi Björn Guðjónsson var mættur í leikmannahóp Kolstad í kvöld eftir að hafa komið til móts við íslenska landsliðið fyrir úrslitahelgi Evrópumótsins í handbolta í Herning um síðastliðna helgi. 

Sigvaldi skoraði eitt mark í leik kvöldsins líkt og liðsfélagi hans Benedikt Gunnar Óskarsson en Benedikt átti einnig tvær stoðsendingar í leiknum. Þá var markvörðurinn Sigurjón Guðmundsson einnig á skýrslu í kvöld en kom ekki við sögu í leiknum. 

Jafnræði var með Kolstad og Follo í allt kvöld, leikar stóðu jafnir í hálfleik, 14-14, og það gerðu þeir líka í leikslok. 29-29. 

Kolstad náði þar með ekki að koma sér í toppsæti deildarinnar og er nú með jafnmörg stig og topplið Elverum sem á leik til góða á morgun á móti Nærbö og getur með sigri komið sér í tveggja stiga forystu á toppi norsku deildarinnar. 

Bras hefur verið hjá Kolstad utan vallar undanfarna mánuði en eftir að hafa spennt bogann hátt og ætlað sér stóra hluti í Evrópu hefur félagið neyðst til að draga saman seglin og farið fram á það við lykilleikmenn félagsins að þeir taki á sig launalækkun. 

Í samtali við Vísi í síðasta mánuði, fyrir keppni á EM, sagði Sigvaldi sín mál enn til skoðunar en að honum væri frjálst að skoða aðra kosti fyrst Kolstad geti ekki staðið við gerða samninga.