Sá reynslumesti hættur með lands­liðinu

Hinn 34 ára gamli Mads spilaði 225 landsleiki á fjórtán ára löngum landsliðsferli og vann til gullverðlauna á HM, EM og ÓL.

Hann er í ellefta sætinu yfir leikjahæstu landsliðsmenn Dana frá upphafi en var reynslumesti leikmaður liðsins á nýafstöðu Evrópumóti. Alls fór hann á sextán stórmót og vann ellefu sinnum til verðlauna.

Á síðustu mótum hefur hann verið í minna hlutverki en áður, en landsliðsþjálfarinn Nikolaj Jacobsen mun koma til með að sakna hans mikið.

„Þetta var óvænt fyrir mig þegar Mads tilkynnti að nú væri tímabært að hætta. Ég hef sagt honum áður að ég er ekki endilega sammála því, en virði auðvitað hans ákvörðun.

Mads hefur verið lykilmaður í liðinu allan þann tíma sem ég hef þjálfað það. Hann hefur kannski ekki alltaf spilað stærsta hlutverkið innan vallar, en hans eiginleikar utan vallar hafa verið okkur mjög mikilvægir. Það er mikill missir af Mads úr landsliðinu“ sagði Jacobsen í tilkynningu á heimasíðu danska handknattleikssambandsins.

Mads Mensah mun halda áfram að spila með liði Skjern í dönsku úrvalsdeildinni í handbolta en hann er samningsbundinn þar næstu þrjú árin.