Tölvuárás á Grund: Af­rituðu gögn um tugi þúsunda manns

Frá því var greint í byrjun desember að óprúttnum aðilum hafi tekist að gera tölvuárás á netþjóna Grundarheimila og þeim tekist að afrita viðkvæmar persónuupplýsingar um skjólstæðinga áður en árásin uppgötvaðist. 

Meðal þeirra gagna voru upplýsingar um heilsufar og gögn sem tengjast umönnun og veittri heilbrigðisþjónustu á heimilunum.

„Allt í það heila tekið“

Ríkisútvarpið greindi frá því í kvöldfréttum sínum að hakkararnir hefðu komist yfir gögn sem næðu mörg ár aftur í tímann og vörðuðu tugi þúsunda manna. 

Karl Óttar Einarsson staðfestir þetta einnig í samtali við Vísi

„Þetta er allt í það heila tekið; núverandi og fyrrverandi heimilismenn, núverandi og fyrrverandi starfsmenn, núverandi og fyrrverandi aðstandendur. Og bæði eru þetta þá látnir einstaklingar og lifandi,“ segir Karl Óttar við Vísi.

Hann tekur þó fram að hakkararnir hafi aðeins gert afrit af gögnunum og þeim virðist ekki hafa tekist að taka þau í gíslingu. Þannig hafi Grund enn aðgang að öllum þessum gögnum. 

Auk þess segir Karl að engar fjárkröfur hafi borist Grund vegna gagnanna og tölvuþrjótarnir hafi ekki hótað hjúkrunarheimilunum með birtingu upplýsinga. 

Interpol rannsakar málið

Enn liggur ekki fyrir hver gerði tölvuárásina. 

Anton Már Egilsson, forstjóri netöryggisfyrirtækisins Syndis, segir að alþjóðalögreglan Interpol og Evrópulögreglan Europol rannsaki einnig málið. Slíkt sé yfirleitt gert í málum sem þessum, þegar erlendir glæpahópar liggja undir grun.

Anton segir að engin merki séu um að gögnin séu komin í dreifingu. Syndis vakti huldunetið svokallaða til að kanna hvort einhver birti gögnin, sem hafi ekki gerst enn.

Þá hefur enginn lýst yfir ábyrgð á árásinni, en Anton telur það líklega vegna þess hve fljótlega gekk að stöðva hana. Mögulega hafi hópurinn litið svo á að árásin hafi ekki verið nógu „spennandi“ eða árangursrík til að stæra sig af, þar sem ekki tókst að taka kerfin í gíslingu.