Eyjakonur höfðu betur í Suðurlandsslagnum

ÍBV leiddi nær allan leikinn en þó var jafnræði með liðunum lengi vel. Það var ekki fyrr en komið var fram á síðasta stundarfjórðung leiksins að Eyjakonur næðu ágætu forskoti sem stóð um tíma í fjórum mörkum, til að mynda í stöðunni 26-22.

Bilið reyndist of stórt fyrir Selfyssinga að brúa og fór svo að ÍBV vann að lokum fimm marka sigur, 31-26.

Sandra Erlingsdóttir var markahæst í liði ÍBV með tíu mörk. Þá skoraði Birna Berg Haraldsdóttir sex mörk. Í liði Selfoss skoraði Marte Syverud tíu mörk. 

Sigurinn gerir það að verkum að ÍBV lyftir sér upp í toppsæti Olís deildarinnar og er þar með jafnmörg stig og Valskonur, þrjátíu talsins, en Valskonur geta þó komið sér aftur á toppinn með jafntefli eða sigri gegn Stjörnunni í leik sem nú stendur yfir.