Segir Guð­jón Val besta þjálfara heims

Gummerbach stóð að spurt og svarað með framkvæmdastjóranum Christoph Schindler á samfélagsmiðlum félagsins. Schindler var spurður út í framtíð Guðjón Vals og hvenær ætti að tilkynna framlengingu á samningi hans.

„Mikilvægustu félagaskiptin sem ég hef gert hér voru að fá hann sem þjálfara,“ sagði Schindler.

„Það er magnað að líta til þess hversu margir leikmenn frá okkur voru á EM í janúar, ellefu talsins. Flestir hafa orðið landsliðsmenn undir leiðsögn Guðjóns Vals.“

Gummerbach sat í næst efstu deild og hafði átt erfið ár þegar Guðjón Valur tók við þjálfun liðsins fljótlega eftir að leikmannaferlinum lauk, árið 2020. Liðið hefur tekið stór framfaraskref og berst í efri hluta þýsku deildarinnar sem og í Evrópu.

„Goggi er búinn að vera hér í mörg, mörg ár. Fyrir mér er hann besti þjálfari í heimi,“ segir Schindler.

Samningur Guðjóns Vals rennur út sumarið 2027, eftir um 18 mánuði. Hann hefur verið orðaður við önnur félög þökk sé árangrinum með Gummerbach en Schindler vonast, eðlilega, eftir frekara samstarfi.

„Við viljum við móta framtíðina saman í langan tíma. Við sjáum til hvort hann verði ein af þessum stórbrotnu framlengingum fyrir framtíðina. Ég mun allavega gera mitt besta.“

Svör Schindlers má sjá í spilaranum en spurningin um Guðjón Val er borin upp þegar rúmar fjórar mínútur eru liðnar á myndbandið.