Eitt helsta kennileiti bæjarins rifið: „Þetta er annað heimilið mitt“

Tómas Arnar Þorláksson skrifar 4. mars 2026 13:39

Eitt helsta kennileiti Akureyrar verður rifið á næstu mánuðum. Leigubílstjóri sem hefur starfað í húsinu í tæp 30 ár segir verulega sorglegt og erfitt að kveðja starfstöðina. Ekki er ljóst hvað verður um starfsemina enn sem komið er.

„Það verður erfitt að kveðja. Það verður mikill söknuður af þessum stað,“ segir Smári Ólafsson leigubílstjóri um Bifreiðastöð Oddeyrar.

Í spilaranum hér að ofan má sjá þetta þekkta kennileiti Akureyrar þarf að víkja og verður rifið á næstu mánuðum að öllu óbreyttu. Þess í stað kemur nútímaleg nýbygging. Leigubílastöðin Bifreiðastöð Oddeyra hefur fengið frest til fyrsta maí til að flytja starfsemina af lóðinni í miðbæ bæjarins samkvæmt ákvörðun bæjarráðs.

Skiptar skoðanir eru um færslu starfseminnar og breytta ásýnd miðsvæðisins í bænum ef marka má athugasemdir við frétt Akureyri.net um málið. „Fáránlegt, verið að skemma miðbæinn,“ segir einn á meðan annar segir ekkert hús vera jafn mikið fyrir.

Einn af þeim sem syrgja hvarf hússins er leigubílstjóri sem hefur starfað þar í nær þrjátíu ár.

„Auðvitað sér maður eftir þessu. Þetta er búinn að vera fastur punktur hérna í tilverunni og það verður skrítið að mæta á einhvern annan stað.“

Þú átt eflaust mikið af góðum minningum hérna?

„Jú jú jú. Margar góðar minningar og margir karakterar sem hafa komið hér við.“

Bifreiðastöð Oddeyrar prýðir miðbæ Akureyrar.vísir/Lýður Valberg

Eitt af því sem er erfiðast að kveðja við húsið er kaffistofa þar sem leigubílsstjórar hafa beðið í 70 ár eftir því að númerið þeirra verði kallað upp fyrir túr. Þar fór vel með mönnum þegar að fréttastofa fékk að kíkja í heimsókn.

Að mati Smára mun það hafa töluverð áhrif á reksturinn að missa starfstöð í miðbænum.

„Við þurfum að leita nýrra leiða til að reka þetta fyrirtæki. Við erum að reka verslun sem hefur stutt mikið við starfsemina. Við erum ekki að fara reka verslun í útjaðri bæjarins. Það eru þreyfingar í gangi með framtíðina. Við erum að reyna færa okkur inn í tæknina. Vonandi verður það bara raunin.“