Ný­bakaði faðirinn með níu mörk

Arnór Þór Gunnarsson þjálfar Bergischer og hans menn stóðu heldur betur uppi í hárinu á Evrópumeisturunum í dag.

Staðan í hálfleik var jöfn, 11-11, og Bergsicher hélt áfram að þjarma að Magdeburg í seinni hálfleik. Þegar rúmar sjö mínútur voru eftir komust heimamenn yfir, 23-22. 

Magdeburg gaf þá aðeins í og komst í 24-26. Bergischer minnkaði muninn í 25-26 en Ómar Ingi gulltryggði sigur Magdeburg, 25-27, þegar hann skoraði sitt níunda mark í leiknum.

Ómar varð pabbi í síðustu viku og hélt upp á það með flottum leik. Hann var næstmarkahæstur í liði Magdeburg á eftir Svíanum Felix Claar sem skoraði tíu mörk.

Gísli Þorgeir Kristjánsson skoraði tvö mörk fyrir Magdeburg en Elvar Örn Jónsson var ekki á meðal markaskorara.

Magdeburg er með sjö stiga forskot á toppi deildarinnar. Bergischer er í 15. sætinu, tveimur stigum frá fallsæti.

Ýmir Örn Gíslason og félagar í Göppingen gerðu góða ferð til Lemgo og unnu heimamenn, 27-30. Þetta var þriðji sigur Göppingen í röð en liðið er með 22 stig í 10. sæti deildarinnar. Ýmir komst ekki á blað í leiknum í dag.

Botnlið Leipzig gerði jafntefli við Stuttgart á heimavelli, 29-29. Blær Hinriksson skoraði tvö mörk og gaf þrjár stoðsendingar fyrir Leipzig sem er þremur stigum frá öruggu sæti.