Íslenski boltinn

Fékk rautt fyrir að rífa í hár mót­herja: „Þetta er al­veg galið“

Ingvi Þór Sæmundsson skrifar
Maci Nicole Teater rífur í hárið á Kimberley Dóru Hjálmarsdóttur.
Maci Nicole Teater rífur í hárið á Kimberley Dóru Hjálmarsdóttur. sýn sport

Maci Nicole Teater, leikmaður Grindavíkur/Njarðvíkur, fékk rautt spjald fyrir að rífa í hár Kimberley Dóru Hjálmarsdóttur, leikmanns Vals, í leik liðanna í Bestu deild kvenna í gær. Sérfræðingar Bestu marka kvenna skilja ekki hvað Teater gekk til.

Í uppbótartíma leiksins á Hlíðarenda í gær reif Teater í tagl Kimberley. Hreinn Magnússon, dómari leiksins, stóð rétt hjá atvikinu og lyfti rauða spjaldinu umsvifalaust.

„Þetta er eitthvað sem á ekki að sjást,“ sagði Helena Ólafsdóttir þegar hártogið var sýnt í Bestu mörkunum.

„Leikurinn er að verða búinn. Þetta er alveg galið. Þetta er hræðilegt og alltof dýrt fyrir þær,“ bætti Bára Kristbjörg Rúnarsdóttir við.

Klippa: Bestu mörkin - hártog á Hlíðarenda

Valskonur náðu forystunni í leiknum í gær þegar Arnfríður Auður Arnarsdóttir skoraði á 15. mínútu eftir slæm mistök markvarðar Suðurnesjaliðsins, Lauren Kellet.

Sophia Faith Romine jafnaði metin sex mínútum síðar með fyrsta marki Grindavíkur/Njarðvíkur í efstu deild. En Ísabella Sara Tryggvadóttir skoraði sigurmark Vals á 66. mínútu.

Næsti leikur Grindavíkur/Njarðvíkur er gegn Þór/KA á heimavelli á fimmtudaginn. Daginn áður sækir Valur Stjörnuna heim.

Innslagið úr Bestu mörkunum má sjá í spilaranum hér fyrir ofan.

Besta deild kvenna UMF Grindavík UMF Njarðvík Valur Bestu mörkin

Mest lesið


Fleiri fréttir

Sjá meira


×

Mest lesið