Spá 4,9 prósenta verð­bólgu í maí

Þá er því einnig spáð að verðbólgan muni mælast 4,9 prósent í ágúst og að það muni virkja forsenduákvæði í kjarasamningum vegna verðbólgu. Þá verði hægt að segja upp samningnum.

Í Hagsjánni segir að samkvæmt verðmælingu hagfræðideildarinnar hafi verð á bensíni og dísilolíu lækkað um 7,1 prósent frá því í apríl. Það sé vegna tímabundinnar lækkunar á virðisaukaskatti. Mikil óvissa ríki þó um olíuverð á heimsvísu.

Þá er gert ráð fyrir því að flugfargjöld til útlanda muni lækka um 7,5 prósent á milli mánaða. Það gerist alla jafna eftir páskahækkun í apríl.

Fyrstu þrjá mánuði ársins voru flugfargjöld um tuttugu prósentum hærri en í fyrra. Gert er ráð fyrir svipaðri þróun á næstu mánuðum, þar sem minna framboð og hátt olíuverð muni áfram hafa áhrif.

Hagfræðideildin gerir ráð fyrir því að verð á matarkörfunni svokölluðu muni hækka um 0,3 prósent í maí. Þá er því einnig spáð að íbúðamarkaður verði rólegri en gengur og gerist. Hægt hafi á hækkunum á bæði íbúða- og leiguverði. Talið er að sú þróun muni endurspeglast í reiknaðri húsaleigu.