Víkingar á­fram eftir framlengda spennu

Ekkert mark var skorað í venjulegum leiktíma en í fyrri hálfleik framlengingar náðu gestirnir úr Fossvogi að brjóta ísinn og vinna að lokum, 2-0.

Samkvæmt Fótbolta.net skoraði Jasmín Erla Ingadóttir fyrra markið eftir mikinn atgang í teignum í kjölfar hornspyrnu. Jasmín lagði svo upp annað mark fyrir Helenu Ósk Hálfdánardóttur sem innsiglaði sigurinn í lokin en báðar komu þær inná sem varamenn eftir klukkutíma leik.

Fjórum leikjum lauk fyrr í kvöld þar sem Grindavík/Njarðvík, FH, Stjarnan og Fram komu sér áfram í 8-liða úrslitin.

Sextán liða úrslitunum lýkur svo á morgun með þremur leikjum þegar Tindastóll mætir ÍBV klukkan 13, Fylkir mætir FHL klukkan 13 og Þróttur tekur á móti Breiðabliki klukkan 15.