Fær­eyingar í skýjunum með HM-sætið: „Eigum bara eftir að verða betri“

Færeyjar unnu Bosníu, 33-28, í seinni leik liðanna í HM-umspilinu í gær. Færeyingar unnu fyrri leikinn í Bosníu, 22-24, og einvígið samanlagt með sjö marka mun, 57-50.

„Þetta snerist ekki svo mikið um hvernig Bosnía spilaði, heldur meira um hvernig við spiluðum sjálfir og um hugarfar og líkamstjáningu,“ sagði Hákun við Kringvarpið eftir leikinn í gær.

Hann skoraði ellefu mörk í leiknum og er orðinn markahæsti leikmaður í sögu færeyska landsliðsins. Enginn vafi lék þó á því í huga Hákuns hvort afrekið var merkilegra; að komast á HM eða slá markametið.

„Það fyrra, að komast á HM. En hitt er skemmtilegt og ég er stoltur af því að vera markahæstur hingað til. Svo er spurningin hvort Elias ætli að elta mig,“ sagði Hákun og vísaði til skærustu stjörnu færeyska liðsins, Eliasar Ellefsen á Skipagøtu, sem gat ekki tekið þátt í leikjunum gegn Bosníu vegna meiðsla.

Færeyjar töpuðu fyrir Norður-Makedóníu í umspili um að komast á HM 2025 með minnsta mun, 61-60. Hákun var glaður að hafa náð markmiðinu að þessu sinni.

„Við erum miklu þroskaðri sem leikmenn. Þegar ég lít til baka var ég afskaplega ungur. Við Óli [Mittún], Elias, Vilhelm [Poulsen] höfum allir tekið skref upp á við og spilum með félagsliðum erlendis, svo þetta er miklu þroskaðra lið, og ég býst við að það eigi bara eftir að verða betra,“ sagði Hákun sem leikur með Füchse Berlin í Þýskalandi.

Færeyska landsliðið hefur verið í mikilli sókn á undanförnum árum og lék á EM 2024 og 2026. Og nú eru Færeyingar komnir á HM 2027 sem fer fram í Þýskalandi.