Hörð gagn­rýni á Alfreð: „Hann hefur ekkert lært“

Alfreð stýrði sínum mönnum í tveimur vináttulandsleikjum gegn Evrópu-, heims- og ólympíumeisturum Danmerkur. Fyrri leikurinn tapaðist 36-28 í Kaupmannahöfn og sá seinni 31-29 í Köln.

Í seinni leiknum voru Danir án leikmanna á borð við Mathias Gidsel, Magnus Saugstrup, Mads Hoxer og Thomas Arnoldsen en það kom ekki að sök og þeir halda áfram hreðjataki á Þjóðverjum. 

Á síðustu tíu árum, í ellefu leikjum, hefur Danmörk alltaf unnið Þýskaland, þar á meðal í úrslitaleiknum á EM í janúar og í úrslitaleik Ólympíuleikanna 2024.

Claus Møller Jakobsen, sérfræðingur TV 2 í Danmörku og fyrrverandi landsliðsmaður, gerði Alfreð að sökudólgi í umræðum eftir leikinn á sunnudaginn. Hann hvetur Þjóðverja til að skipta um þjálfara eftir heimsmeistaramótið í Þýskalandi í janúar, þegar samningur Alfreðs rennur út.

Sér enga þróun og ekkert leikskipulag

„Mér finnst það mikið áhyggjuefni að sjá hvernig Alfreð Gíslason hefur nákvæmlega ekkert lært síðan á lokamóti EM í janúar um hvað það þýðir að fá þetta lið til að spila sem liðsheild,“ sagði Møller Jakobsen. Hann segir sóknarleik Þýskalands snúast allt of mikið um einstaklingsframtak.

„Þegar Juri Knorr er á vellinum þá snýst allt um Juri Knorr og hinir verða bara aukaleikarar í sirkusi Knorr,“ sagði Møller Jakobsen, sannfærður um að þýska liðið sé ekki á réttri braut undir stjórn Alfreðs.

„Ef maður horfir einangrað á hvernig leikurinn þróast og hvernig hann þróar þetta landslið áfram og fellir þessa mjög hæfileikaríku og ungu leikmenn inn í það, þá sé ég enga þróun og ekkert leikskipulag. Ég sé ekkert sem er gert til að efla sérstaka styrkleika þessara ungu leikmanna,“ sagði hann og fékk stuðning frá Lasse Svan.

Svan sagðist telja landsliðið komið á stað „þar sem það þyrfti á meiri taktískri færni að halda og þjálfara með leikskipulag sem leikmennirnir tryðu á.“

Besta lið heims þó nokkra vanti

Sjálfur benti Alfreð á hve mikið yfirburðalið Danmörk hefur verið síðustu ár og virðist enn vera.

„Danmörk er líklega enn næstbesta lið heims [á eftir fullskipuðu liði Danmerkur] þrátt fyrir að nokkra leikmenn vanti. Á móti slíku liði þarftu að spila mjög, mjög vel til að vinna. Það tókst okkur ekki alveg – þess vegna er ég vonsvikinn,“ sagði Alfreð.

Knorr tók í svipaðan streng: „Nú höfum við unnið silfur á tveimur af síðustu þremur mótum. Auðvitað erum við meðal þeirra sem geta unnið til verðlauna, en það væri ofmat að segja núna að við séum líklegir til að vinna titilinn [heimsmeistaratitilinn í janúar á heimavelli] þegar við töpum fyrir Danmörku, jafnvel fyrir meintu B-liði þeirra,“ sagði Knorr.