Haukur kom að tíu mörkum en meistararnir fögnuðu sigri

Magdeburg var á útivelli en fagnaði þriggja marka sigri, 33-30, eftir að hafa verið 17-13 yfir í hálfleik. 

Haukur Þrastarson var að vanda í lykilhlutverki hjá Löwen og skoraði sex mörk auk þess að gefa fjórar stoðsendingar. Hann er fjórði markahæstur í deildinni og hefur átt langflestar stoðsendingar, og var verðlaunaður með nýjum samningi á dögunum.

Íslendingarnir í Magdeburg höfðu óvenju hægt um sig, í þessum fyrsta leik eftir að meistaratitillinn var í höfn. Gísli Þorgeir Kristjánsson skoraði tvö mörk og átti eina stoðsendingu, Ómar Ingi Magnússon skoraði tvö og átti tvær stoðsendingar, og Elvar Örn Jónsson skoraði eitt mark.

Magdeburgarmenn eiga enn tvo leiki eftir í deildinni en bíða eftir úrslitahelginni í Köln, í Meistaradeild Evrópu. Liðið hefur aðeins tapað einum deildarleik á tímabilinu og gert tvö jafntefli, og er langefst með 60 stig.

Löwen er í 8. sæti deildarinnar með 35 stig.