Flugrisi eignast allan flug­flota Air Atlanta

Í kvöldfréttum Sýnar kom fram að lykilstjórnendur Air Atlanta, undir forystu forstjórans Baldvins Más, hefðu keypt 51 prósents hlut.

„Þetta er framkvæmdastjórn félagsins öll og ég sem leiði hópinn,“ segir Baldvin Már Hermannsson.

Fyrri aðaleigendur, undir forystu Hannesar Hilmarssonar, seldu sinn hlut.

„Þetta eru ákveðin kaflaskil þar sem að núverandi meirihlutaeigendur eru bara að stíga stoltir frá borði eftir tuttugu ára uppbyggingu. Þeir tóku við félaginu, má segja, kannski ekki á frábærum stað,“ segir Baldvin.

Mesta athygli vekur að stærsta fraktflugfélag heims, hið bandaríska Atlas Air, kemur inn með 49 prósenta hlut. Baldvin segir það viðurkenningu á því hve vel hafi tekist að styrkja og efla Air Atlanta.

„Þetta gefur okkur einfaldlega aukinn alþjóðlegan slagkraft til að efla félagið. Þetta gefur mögulega aðgengi að fleiri vélum.“

Atlas mun eignast nítján breiðþotur Air Atlanta, sem mun leigja þær til baka, og halda þær núverandi skráningum. Samtals eru félögin með um eitt hundrað breiðþotur í rekstri.

„Þannig að samlegðin verður umtalsverð, sama hvort það kemur að kaupum á varahlutum, viðhaldsþjónustu, bara í sameiginlegum innkaupum og slíku. Þannig að tækifærin eru fjölmörg.

Þeir horfa líka til þess að við höfum ýmislegt upp á að bjóða sem þeir hafa ekki; „trafik“-réttindi og annað,“ segir Baldvin hér í sjónvarpsfrétt Sýnar:

En kannski er stærsta spurningin þessi: Verður þetta fertuga flugfélag áfram íslenskt eða er þetta kannski bara byrjunin á því að erlendur flugrisi gleypi það með húð og hári?

„Bara síður en svo,” svarar Baldvin Már.

„Við erum með 51 prósents hlut í félaginu, ég er stjórnarformaður og forstjóri félagsins, þannig að völdin hvíla hjá okkur. Air Atlanta er ekki að fara neitt.

Air Atlanta er fyrst og fremst alþjóðlegt flugfélag. Við erum ekki bara íslenskt, við erum líka með flugrekstrarleyfi á Möltu.“

Og raunar starfsstöðvar víða um heim.

„Þannig að Ísland er að sjálfsögðu þar sem við erum með höfuðstöðvarnar. Það eru engar breytingar þar.

Það er sama stjórnendateymi, það er sama fólk, engar breytingar fyrirætlaðar og ekkert slíkt í kortunum.

Reksturinn gengur vel og það er ástæðan fyrir því að Atlas hefur einhvern áhuga á því að koma og eiga við okkur samstarf,“ segir Baldvin Már Hermannsson.

Atlas er stærsti flugrekandi Boeing 747-þotunnar í heiminum og fékk síðasta eintakið úr verksmiðjunni fyrir þremur árum, eins og fram kom í þessari frétt: