Tuttugustu ferð Icelandair af­lýst vegna mann­eklu

Farþegavél Icelandair átti að fara í loftið frá Keflavíkurflugvelli klukkan 7:20 í morgun og fljúga til Zürich í Sviss. Ferðinni var hins vegar aflýst. Ásdís Ýr Pétursdóttir, forstöðumaður samskipta hjá Icelandair, staðfestir að fluginu hafi verið aflýst vegna þess að flugmenn fengust ekki til ferðarinnar.

Átján farþegaferðum og tveimur fraktferðum frá Keflavík hefur nú verið aflýst frá 5. maí samkvæmt upplýsingum Ásdísar. Þremur brottförum var aflýst í gær.

Icelandair og flugmenn félagsins eiga í kjaraviðræðum. Flugmenn hafa ekki lýst yfir verkfalli eða formlegum aðgerðum en flugfélagið fullyrðir að flugmennirnir hafi tekið sameiginlega ákvörðun um að selja ekki frídaga sína líkt og þeir hafi gert í kjaradeilu árið 2014.

Flugmenn hafa hafnað því og segja vandann liggja í því að Icelandair hafi byggt flugáætlun sína upp á þeirri forsendu að fyrirtækið gæti keypt frídaga af flugmönnum.

Kjaradeilan er á borði ríkissáttasemjara en hann lagði á fjölmiðlabann. Síðast var fundað í kjaradeilunni á föstudag.