Yfir fimm hundruð ára gamalt kort af Ís­landi

Sýningin Land fyrir stafni var opnuð fyrr í sumar en þar er til sýnis kortasafn þýsku hjónanna dr. Karl-Werner Schulte og dr. Gisela Schulte-Daxbök sem tóku ástfóstri við Ísland og Akureyri. Gisela lést 2019 og er grafin í Lögmannshlíðarkirkjugarði og hefur Karl-Werner gengið frá því að hann verði grafinn við hlið hennar þegar hans tími er kominn. Hann fagnaði áttræðisafmæli sínu í júní og gaf Akureyrarbæ sína síðustu gjöf úr safninu. Þar má meðal annars finna elsta þekkta prentaða kortið þar sem sjá má Ísland, prentað árið 1507.

„Þetta er kort sem sýnir norðurhluta Evrópu. Maður myndi kannski ekki alveg þekkja allt með því að horfa á kortið. En hér ratar Ísland á kortið og er eiginlega eins og skjaldbaka þarna í horninu,“ segir Haraldur Þór Egilsson, safnstjóri Minjasafnsins.

Til sýnis eru 212 kort frá 1507 til 1849 eftir marga helstu kortagerðarmenn Evrópu fyrri alda.

„Við lifum á tímum þar sem útprentið úr posanum lifir varla af gönguferðina út í bíl, þannig það er stórmerkilegt að það hafi verið til kort af Íslandi og að það hafi varðveist,“ segir Haraldur.