Skemmdir á nýrri vatns­leiðslu til Eyja

Í yfirlýsingu á vef Vestmannaeyjabæjar segir að greiningar- og úttektarvinna sé hafin á vettvangi þar sem skemmdirnar urðu á lögninni. Hún hafi staðið yfir undanfarna daga og beðið sé eftir skýrslu frá fyrirtækinu Subsea 7.

Það fyrirtæki hefur séð um útlagninguna og á skýrslan að staðfesta bæði nákvæmar orsakir tjónsins og umfang. Þegar þær niðurstöður liggja fyrir verða frekari upplýsingar veittar um stöðuna.

Útlagningin hófst í sumar en leiðslunni er ætlað að tryggja öruggari vatnsöflun fyrir íbúa Vestmannaeyja.

Árið 2023 urðu miklar skemmdir á neysluvatnslögn til Eyja þegar ankeri skipsins Hugins VE dróst eftir botni hafnarinnar þar. Bærinn höfðaði skaðabótamál vegna skemmdanna en Huginn, Vinnslustöðin og VÍS voru sýknuð í héraðsdómi. Málinu hefur verið áfrýjað til Landsréttar.