Kveðja Bjarna með miklum söknuði

Eins og Vísir fjallaði um í gær er Bjarni búinn að semja við sænska C-deildarfélagið Trelleborg. Hann hefur áður leikið í Svíþjóð með Kristianstad 2016-2017 og með Brage 2019-2021.

Bjarni kom til Vals fyrir tímabilið 2024 og hefur auk þess að spila fyrir liðið aðstoðað við þjálfun í 3. flokki karla.

„Bjarni hefur verið frábær félagsmaður og mikilvægur leikmaður fyrir félagið undanfarin ár og við munum sakna hans mikið,“ segir í tilkynningu Vals þar sem honum er þakkað fyrir hans framlag og óskað góðs gengis í Svíþjóð.

Bjarni sjálfur sendir eftirfarandi kveðju:

„Takk kærlega fyrir mig Valur. Ég er mjög þakklátur að hafa kynnst öllu því frábæra fólki sem að vinnur fyrir og er í kringum íþróttafélagið Val. Að lokum vil ég þakka samherjum mínum fyrir tímann, magnaður hópur sem gekk í gegnum mikið saman og ég tek með mér vini til lífstíðar.“

Trelleborg er í sænsku C-deildinni en á hraðleið upp í næstefstu deild því liðið er efst í suðurhluta C-deildarinnar, fjórum stigum á undan næsta liði.