Sísí Ey snýr aftur eftir tíu ára fjar­veru

Hljómsveitina skipa systurnar Elín, Elísabet og Sigga Eyþórsdætur sem þarf vart að kynna en þær tóku meðal annars þátt í Eurovision fyrir Íslands hönd árið 2022 með laginu Með hækkandi sól. 

Þrátt fyrir langa pásu er Sísí Ey með dygga hlustendur og rúmlega 90 þúsund mánaðarlega hlustendur á streymisveitunni Spotify. Nýja lagið þeirra heitir Up Close og er unnið í samvinnu við tónlistarmanninn Oculus, sem er með þeim í hljómsveitinni.

Í spilaranum hér að neðan má hlusta á lagið: 

Sísí Ey var stofnuð árið 2011 og þróaði sveitin snemma með sér einstakan hljóm með hústónlistarbrag og öflugum og lifandi samsöng í röddun. Hljómsveitin hefur meðal annars hitað upp fyrir danstónlistardúóið Hercules and Love Affair og gefið út lög í gegnum tónlistarfyrirtækið Defected Records. Þau komu sömuleiðis fram á Eclipse tónlistarhátíðinni á Snæfellsnesi í kringum almyrkvann.

Hér má hlusta á lagið á streymisveitunni Spotify.