Kröpp og djúp lægð og vara­samar vind­hviður

Þetta kemur fram í hugleiðingum veðurfræðings Veðurstofu Íslands. Þar segir að vindhviður undir Eyjafjöllum, í Mýrdal og Öræfum geti verið varasamar bílum sem taka á sig mikinn vind. Lægðardragið muni fjarlægast smám saman í dag en þá dregur jafnharðan úr vindi og rigningu.

Í nótt nálgist lægðin svo enn frekar og hvessir þá aftur og gerir sunnanhvassviðri eða storm á morgun fimmtudag. Því fylgir talsverð eða mikil rigning á sunnanverðu landinu en léttir til fyrir norðan. Áfram hlýtt í veðri. Á föstudag er útlit fyrir hæga sunnanátt með stöku skúrum, en þurrviðri fyrir norðan. Kólnar aðeins í veðri.

Austlæg átt, 10-18 m/s, en 18-23 um tíma syðst framan af morgni. Rigning víða um land, talsverð eða mikil úrkoma suðaustanlands. Hægari og rofar víða til seinnipartinn, en hvessir aftur og bætir í úrkomu í kvöld. Sunnan og suðaustan 13-18 m/s á morgun, en 18-23 austantil fram eftir degi. Dregur úr vindi og úrkomu annað kvöld. Hiti 7 til 15 stig, hlýjast á Norðurlandi.