Hef verið latur að sýna á Íslandi

"Þetta er eins konar yfirlit yfir það sem ég hef veirð að fást við í myndlist frá upphafi, svona alveg frá því ég var ellefu ára gamall," segir Þorvaldur Þorsteinsson, myndlistarmaður og rithöfundur, um stóra sýningu sem hann opnar í Hafnarhúsinu í kvöld. Á seinni árum hefur Þorvaldur verið þekktari sem rithöfundur hér á landi en myndlistarmaður, þótt upphaflega hafi hann lagt af stað sem myndlistarmaður. "Þetta er sýningin sem ég hefði átt að halda fyrir löngu, því ég hef verið latur við að sýna á Íslandi. En ég hef sýnt mjög mikið erlendis síðustu 14 til 15 árin," segir hann, og bætir því við að ástæðuna fyrir þessu misræmi sé líklega að finna í því að þar sem hann skrifar á íslensku liggi beint við að starfa hér á landi sem rithöfundur, en myndlistin sé hins vegar alþjóðlegt tungumál og því geti hann leyft sér að hafa stærri vettvang fyrir hana. "Við undirbúningsvinnuna að þessari sýningu komu í ljós, fyrir mig að minnsta kosti, skýrari tengingar milli myndlistarmannsins og rithöfundarins en ég hafði gert mér grein fyrir." Sýningin tekur yfir fimm sali í húsinu og Þorvaldur segist spenntur fyrir viðbrögðunum, ekki síst við nýju verki sem hann hefur unnið samstarfi við Icelandair.