Einfaldari og lægri gjaldskrá

Nú hefur Tryggingamiðstöðin kynnt breytingar á bílatryggingum. Markmið Tryggingamiðstöðvarinnar er að gera bílatryggingar eins einfaldar og gegnsæjar og hægt er. Helstu breytingar á tryggingunum er að bónuskerfið er lagt niður, allir tryggingatakar hjá Tryggingamiðstöðinni fá bestu kjörin og tryggingagjaldskráin er miklu einfaldari. Einnig veita nýju bílatryggingarnar algjört valfrelsi tryggingataka um fjárhæð sjálfsábyrgðar við kaskótryggingu. Ef tjónsbætur einstaklings sem veldur tjóni eru hærri en 50.000 krónur þá greiðir sá hinn sami aðeins 15.000 krónur fyrir hvert skipti sem hann veldur tjóni. Tryggingamiðstöðin er með þessum breytingum að stuðla að einfaldari bílatryggingakerfi á Íslandi. Bónuskerfið sem við höfum vanist er úrelt þar sem tryggingafélögin hafa ekki framfylgt kerfinu og næstum því allir komnir með hæsta bónus. Með þessum breytingum eru einnig allir jafnir þegar kemur að bílakaupum. Það skiptir ekki máli hvort aldurinn er 17 ár eða 40 -- allir greiða það sama í bílatryggingar.  Nýja gjaldskráin tekur gildi nú þegar fyrir þá sem eru að tryggja í fyrsta skipti og við næstu endurnýjun hjá þeim sem eru með bílatryggingar í gildi.