Meðferð málsins skrípaleikur

Stjórnarandstaðan í Allsherjarnefnd Alþingis segir meðferð fjölmiðlamálsins skrípaleik. Fundur nefndarinnar hófst klukkan fimm í dag, en var frestað í morgun. Meirihluti nefndarinnar kynnti ekki niðurstöðu stjórnarformannanna en sagði að hún yrði kynnt á fundi nefndarinnar á morgun. Stjórnarandstaðan fór hörðum orðum um meðferð málsins í nefndinni fyrir fundinn sem hófst rúmlega fimm. Áður en nefndin kom saman hittist meirihlutinn og ræddi niðurstöðu formanna stjórnarflokkanna. Henni var hinsvegar haldið leyndri fyrir öðrum fundarmönnum. Á fundinum var hinsvegar fellt að afgreiða frumvarp stjórnarandstöðunnar um þjóðaratkvæðagreiðslu úr nefndinni svo það gæti farið til umræðu í þinginu. Steingrímur J. Sigfússon, formaður Vinstri grænna segir að stjórnarherrarnir vilji halda spilunum hjá sér og að vinnan í nefndinni hafi verið skrípaleikur síðan um miðja síðustu viku. Málið fari nýjan hring. Össur Skarphéðinsson, formaður Samfylkingarinnar vildi ekki spá fyrir um niðurstöðu þar sem þetta væri í fimmta skipti sem stjórnarflokkarnir hefðu komist að samkomulagi. Hann efaðist þó um að lögin yrðu samþykkt.