Eigendur Toyota ánægðastir

Niðurstöður úr árlegri könnun könnunarfyrirtækisins J.D. Power og þýska bílatímaritsins MOT sýn að eigendur Toyota eru ánægðastir allra bílaeigenda í Þýskalandi. Þetta er þriðja árið í röð sem þýskir bílaeigendur eru ánægðastir með Toyota og hefur bílaframleiðandinn þónokkra yfirburði fram yfir þá bíla sem næstir koma. Toyota Corolla fékk flest stig, eða 859 og í öðru sæti var Toyota Avensis með 847 stig. 24.483 bílaeigendur tóku þátt í könnuninni með því að leggja mat á frammistöðu bílsins og þjónustuaðila eftir tveggja ára reynslu. Alls voru 77 þættir teknir til skoðunar í könnuninni, svo sem þægindi, öryggi og hönnun. Að þessu sinni voru 119 gerðir af 28 bílategundum skoðaðar í könnuninni. Nánari upplýsingar um könnunina er hægt að finna á heimasíðu J.D. Power, jdpower.com.