Betra að borða í hádeginu

Unglingar sem borða ekki hádegismat eru líklegri til að verða of þungir en jafnaldrar þeirra sem borða í hádeginu. Þetta kemur fram í norskri rannsókn sem nýlega birtist. Vísindamennirnir sem starfa við Háskólann í Ósló rannsökuðu matarvenjur 13 ára unglinga í Noregi um árabil. Á árunum frá 1993 til 2000 jókst fjöldi of feitra 13 ára unglinga þar í landi um 57 prósent meðal drengja og 47 prósent meðal stúlkna og er þá miðað við alþjóðlega staðla um það hvað telst að vera of feitur. Ekki er tekin afstaða til þess í rannsókninni hvort það að borða hádegismat sé eitt af einkennum þess að lifa heilsusamlegu lífi yfirleitt eða hvort þeir sem ekki borða hádegismat bæti sér það upp með því að borða eitthvað óhollt þegar hungrið sverfur að. Rannsóknin sýndi einnig að eftir því sem ungmennin eltust voru þau líklegri til að sleppa morgunmatnum. Auk þess bendir hún til þess að samhengi sé milli þyngdar ungmenna, menntunar foreldra og sjónvarpsáhorfs.