Allt brann sem brunnið gat

Ekki hefur verið staðfest hvað olli bruna í einbýlishúsi að Bárugötu á Sauðárkróki. Allt brann sem sem brunnið gat í austurhluta stofunnar, þar sem eldurinn kom upp, segir Björn Mikaelsson, yfirlögregluþjónn á Sauðárkróki. Sýni hafa verið send suður til frekari rannsóknar. Lögreglan rannsakar málið. Ungur maður lést í eldsvoðanum. Lík hans hefur verið sent suður til rannsóknar. Ekki er hægt að greina frá nafni hans fyrr en niðurstöður liggja fyrir. Fimm menn úr tæknideild lögreglunnar í Reykjavík hafa staðið að rannsókn brunans í íbúðarhúsinu. Menn ríkislögreglustjóra sjá um framburðaskýrslutöku á vitnum. "Við vorum að tala um að eldurinn gæti hafa stafað af sígarettu í sófa en til þess að útiloka allt þarf að sópa gólfið, taka sýni og senda í rannsókn," segir Björn.