Eigendur 67% hlutafjár samþykkja

Að meðtöldum eignarhlut Íslandsbanka í BNbank þá hafa eigegndur að meira en 67% hlutafjár samþykkt yfirtökutilboð Íslandsbanka  í BNbank. Tilboðstímabilið hófst 1. desember og því lýkur 17. desember. Þar sem þessum áfanga hefur nú þegar verið náð og með vísan til yfirlýsingar bankans frá 15. nóvember síðastliðnum vegna yfirtökutilboðs Íslandsbanka í BNBank, hefur bankaráð Íslandsbanka samþykkt að auka nú hlutafé félagsins, með vísan til heimildar í samþykktum félagsins, með sölu á 1.500 milljón nýjum hlutum til forgangsréttarhafa. Markaðsviðskipti bankans hafa umsjón með útboðinu. Til að mæta hugsanlegri umframeftirspurn í útboðinu eða ef aðrir fjárfestar en forgangsréttarhafar lýsa yfir áhuga á hlutum í félaginu í tengslum við útboðið, mun bankaráð við lok áskriftartímabilsins taka ákvörðun um hvort nýtt verður heimild í samþykktum félagsins til útgáfu á allt að 500 milljón hlutum án forgangsréttar hluthafa. Tilgangur hlutafjáraukningarinnar er tvíþættur. Annars vegar að fjármagna kaupin á BNbank og hins vegar að styrkja eiginfjárstöðu bankans vegna mikils vaxtar í útlánum bankans. Sá vöxtur er bæði í almennri útlánastarfsemi bankans innanlands og utan, m.a. í Lúxemborg sbr. tilkynningu bankans 7. desember um stofnun banka í Lúxemborg og útvíkkaða starfsemi þar. Réttur hluthafa til áskriftar í útboðinu miðast við hlutaskrá bankans við lok viðskipta þann 7. desember. Eins og tilkynnt var við lok sölu 1.000 milljón hluta 15. nóvember síðastliðinn, er gert ráð fyrir að verð til forgangsréttarhafa nú verði hið sama og þá, eða 10,65 krónur á hlut. Útboðið verður auglýst í næstu viku og nánari upplýsingar verða í útboðs- og skráningarlýsingu sem birt verður fyrir upphaf áskriftartímabils. Gert er ráð fyrir að áskriftartímabilið hefjist 17. desember og því ljúki 4. janúar. Greiðsludagur er ráðgerður 25. janúar. Íslandsbanki hefur skilgreint Noreg og Ísland sem heimamarkaði sína og hyggst leggja áherslu á vöxt á norska markaðnum. BNbank er afar samkeppnishæft og vel rekið fjármálafyrirtæki, sem náð hefur góðum  árangri og fellur vel að stefnu Íslandsbanka. Kaupin á BNbank munu tvöfalda útlán og innlán Íslandsbankasamstæðunnar.