Leið til að bæta líðan

Þeir sem þurfa að kljást við kvíða í daglegu lífi geta farið inn á heimasíðu Mímis símenntunar mimir.is og farið þar í gegnum námskeiðið Kvíði í lífi og starfi. Tölvan leiðir fólk í gegnum námsefnið sem á að hjálpa því að skilja eigin tilfinningar og erfiða líðan og í framhaldi af því að finna úrræði til að ná stjórn á kvíða og depurð. Þarna er lýst aðstæðum sem margir þekkja. Ein sagan er um Gunnar sem finnst hann ekki ráða lengur við það sem honum er falið að gera í vinnunni eftir að fyrirkomulagi þar var breytt. Hann fær ekki lengur þá gleði út úr vinnunni sem hann fann áður, finnst enginn virða það sem hann gerir. Hann hefur engan tíma til að stunda sund lengur og andlega heilsan er á niðurleið. Hvað er til ráða? Tölvan bendir á leiðir og þar er beitt hugrænni atferlismeðferð. Námsefnið var sett upp fyrir fáum vikum og að sögn Aðalheiðar Sigurjónsdóttur hjá Mími hafa viðbrögð við því verið jákvæð.