Minnumst og höldum á­fram

"Við minnumst þessara atburða en látum þá ekki trufla okkur og höldum ótrauð áfram," segir Sigurður Hafberg, grunnskólakennari á Flateyri. Húsfyllir var í íþróttahúsinu á Flateyri í gærkvöldi en þar fór fram minningarathöfn í tilefni þess að tíu ár eru liðin frá því að snjóflóð féll á bæinn með þeim hörmulegu afleiðingum að tuttugu manns létu lífið.

Athöfnin stóð í eina og hálfa klukkustund og talið er að nærri 450 manns hafi verið viðstaddir. Að athöfninni lokinni bauð Ísafjarðarbær upp á veitingar. Frú Vigdís Finnbogadóttir flutti ræðu við athöfnina og var það eina ræðan sem haldin var. Á eftir fylgdu tónlistaratriði og ljóða­lestur.

Þyrla Landhelgisgæslunnar TF-LÍF flutti Halldór Ásgrímsson forsætisráðherra og Geir Haarde utanríkisráðherra vestur, en hún var eini farkosturinn sem lent gat þar í gærkvöldi þar sem snjó kyngdi niður.

Á Flateyri var einnig varðskipið Týr og var forstjóri Landhelgisgæslunnar, Georg Lárusson, viðstaddur. Týr og áhöfn sinntu björgunarstörfum í kjölfar flóðsins 1995.

Á sama tíma var haldin minningarathöfn í Neskirkju við Hagatorg í Reykjavík. Þar var húsfyllir.