Viðurkennir fyrningu kærunnar

Sýslumaðurinn í Vestmannaeyjum viðurkennir að kæra sem kona lagði fram á hendur fyrrverandi eiginmanni sínum fyrir líkamsárás var orðin fyrnd þegar maðurinn var ákærður.  Hildur Sigurðardóttir, fjögurra barna móðir úr Vestmannaeyjum, bjó við áralangt ofbeldi af hálfu eiginmanns síns sem nú er í haldi lögreglu í Þýskalandi fyrir tilraun til smygls á kókaíni og hassi. Hún greindi frá því í viðtali við fréttastofu Stöðvar 2 í lok síðustu viku að kæra á hendur honum fyrir líkamsárás hafi gleymst og verið fyrnd þegar kom að ákæru. Fréttastofa hefur án árangurs reynt að fá Karl Gauta Hjaltason, sýslumann í Vestmannaeyjum, í viðtal vegna málsins. Í dag barst frá honum yfirlýsing þar sem fram kemur að lögreglan hafi oft haft afskipti af málum Hildar og fyrrverandi eiginmanns hennar. Lögreglan hafi gert allt sem í hennar valdi stóð til að tryggja öryggi Hildar og heimilis hennar. Þannig hafi embættið snemma á árinu 2003 farið fram á nálgunarbann sem lagt hafi verið á í fimm mánuði. Í gögnum lögreglu sé að finna eina skráningu vegna brots á því og hafi sýslumaður talið að ástandið hafi skánað verulega á þeim tíma. Fram hafi komið í umfjöllun Stöðvar 2 að nálgunarbann hafi verið brotið en fyrir það hafi maðurinn verið ákærður og dæmdur ásamt með nokkrum öðrum brotum. Við gerð þeirrar ákæru hafi komið í ljós að eitt af þeim fjölmörgu málum sem lágu fyrir á hendur kærða, þ.e. líkamsárás sú sem Hildur kærði, hafi verið fyrnd. Maðurinn var dæmdur í sextíu daga fangelsi, skilorðsbundið í þrjú ár, fyrir Héraðsdómi Suðurlands síðastliðið sumar. Frekari eftirmálar verða ekki í málinu hvað varðar Sýslumannsembættið í Vestmannaeyjum en Hildur getur enn höfðað skaðabótamál á hendur manninum fyrir líkamsárásina.