Braut lög en var sýknuð af kröfum

Vegagerðin braut lög með því að hafna öllum tilboðum í Héðinsfjarðargöng árið 2003, samkvæmt Héraðsdómi Reykjavíkur í dag. Vegagerðin var hins vegar sýknuð af bótakröfu Íslenskra aðalverktaka sem áttu lægsta boð í verkið þar sem fyrirtækinu hafði ekki tekist að sýna fram á tjón. Lögmaður Íslenskra aðalverktaka segir dóminn marka tímamót. Dóminum verður að öllum líkindum áfrýjað. Vegagerðin bauð í mars árið 2003 út Héðinsfjarðargöng og voru þau opnuð í maí. Þar kom í ljós að Íslenskir aðalverktakar og NCC áttu lægsta boð, tæplega 6,2 milljarða króna, sem var þremur prósentumt yfir kostnaðaráætlun og um 400 milljónum undir næsta boði. Í júlí var hins vegar ákveðið að fresta verkinu vegna þensluástands og öllum tilboðum hafnað. Íslenskir aðalverktakar sættu sig ekki við þetta og kærðu til kærunefndar útboðsmála sem komst að þeirri niðurstöðu að ákvörðun um að hafna öllum tilboðum hefði verið ólögmæt. Héraðsdómur Reykjavíkur komst að sömu niðurstöðu í dag. Hins vegar hafnaði dómurinn kröfu verkbjóðenda um bætur á þeirri forsendu að ekki hafi verið öruggt að þeir hefðu fengið verkið og að ekki hafi verið færðar óyggjandi sannanir fyrir því að fyrirtækin hefðu þarna orðið af arði af verkinu. Jóhannes Karl Sveinsson, lögmaður verktakafyrirtækjanna, fagnar niðurstöðunni um að ákvörðun Vegagerðarinnar hafi verið ólögmæt. Hann segir dóminn marka tímamót. Svona dómur hafi hvorki fallið hér á landi né annars staðar á Norðurlöndum og eftir því sem hann best viti ekki heldur í Evrópu. Fræðimenn hafi aðallega velt þessu fyrir sér hingað til. Jóhannes Karl telur rök dómsins fyrir að hafna bótakröfunni ekki fullnægjandi, tilboð umbjóðenda hans hafi verið það mikið undir næstlægsta boði og að það hafi verið yfir þeirri kostnaðaráætlun sem Vegagerðin gerði sjálf. Hann býst við að málinu verði áfrýjað. Þetta sé það mikið grundvallarmál um samskipti opinberra verkkaupa og verktaka að það verði að fá skýra niðurstöðu.