Hálft ár fyrir að smygla Kínverjum

Maður frá Singapúr var í Héraðsdómi Reykjaness í dag dæmdur í sex mánaða fangelsi fyrir að hafa smyglað fólki ólöglega á milli landa. Fjórir Kínverjar voru með honum í för og um tíma var talið að stúlkurnar, sem eru þrjár, væru 15 til 17 ára gamlar. Nú hefur hins vegar verið staðfest að fólkið er á aldrinum 19 til 24 ára. Ekki var hægt að ákæra manninn fyrir mansal þótt grunur væri um slíkt þar sem Ísland er ekki áfangastaður þeirra og brotið því ekki fullframið. Sjálf halda ungmennin sem talin eru fórnarlömb að þau hafi verið á leið til fyrirheitna landsins og hafa engan grun um hvað hefði getað beðið þeirra. Þau eru því ósátt við inngrip íslenskra stjórnvalda.