Meðvitundarlaus eftir líkamsárás

Einn var fluttur meðvitundarlaus á sjúkrahúsið á Ísafirði eftir líkamsárás í miðbænum í nótt. Ekki er vitað hver upptök árásarinnar voru en tveir voru handteknir í tengslum við hana og gista þeir nú fangageymslur lögreglunnar. Sá sem slasaðist er til aðhlynningar á sjúkrahúsinu. Í annarri líkamasárás, sem varð fyrir utan skemmtistað í bænum, meiddist einn og var fluttur á slysadeild. Enginn var handtekinn vegna árásarinnar. Þá var einn handtekinn og látinn gista fangageymslur vegna ölvunar og óspekta. Maður sem ók á staur og hafnaði utan vegar skammt fyrir utan Bolungarvík í nótt er grunaður um ölvun við akstur að sögn lögreglunnar þar. Maðurinn slapp með minniháttar meiðsl og var hann látinn sofa úr sér í fangageymslum lögreglunnar á Ísafirði. Bíllinn stórskemmdist en grunur leikur á að maðurinn hafi tekið hann ófrjálsri hendi við höfnina í Bolungarvík. Maðurinn verður yfirheyrður þegar hann hefur sofið úr sér vímuna.