Kona myrt á varnarliðssvæði

Tvítug varnarliðskona var myrt á varnarsvæði bandaríska hersins á Keflavíkurflugvelli á miðnætti í nótt. Varnarliðsmaður er í haldi herlögreglunnar grunaður um verknaðinn. Íslensk kona er í haldi lögreglunnar á Keflavíkurflugvelli. Hún er talin hafa verið vitni að verknaðinum og getað gefið mikilvægar upplýsingar. Lögreglan á Keflavíkurflugvelli rannsakar málið ásamt rannsóknardeild sjóhersins. Von er á bandarískum rannsóknarmönnum frá Bretlandi til að aðstoða við að upplýsa málið. Jóhann R. Benediktsson, sýslumaður á Keflavíkurflugvelli, segir að á þessu stigi málsins sé ekkert hægt að segja annað en að unga konan hafi fundist látin og íslensk og bandarísk yfirvöld rannsaki málið. Aðspurður hvort einhverjir séu í haldi vegna málsins segir Jóhann að Bandaríkjamaður hafi verið handtekinn, en hann sé talinn tengjast láti konunnar. Þá sé íslensk kona í haldi en hún sé talin hafa verið vitni. Spurður hvort hann viti hvaða vopn hafi verið notað við verknaðinn segir Jóhann ekkert geta sagt annað um málið að svo stöddu.