Ákaflega gleðilegt

"Þetta er ákaflega gleðilegt fyrir mig og alla sem starfa hjá Landhelgisgæslunni enda löngu tímabært," segir Georg Lárusson, forstjóri Landhelgisgæslunnar. Ríkisstjórnin tilkynnti í gær að þrír milljarðar af því fé sem í ríkiskassann kom vegna sölu Símans fari í tækjakaup fyrir Landhelgisgæsluna og er féð eyrnamerkt til kaupa á einni flugvél og nýju gæsluskipi. Áður höfðu verið uppi hugmyndir um að leigja slíkan tækjakost og segir Georg það ekki enn útilokað en á þeim tíma hafi engir peningar heldur verið til og því sé staðan breytt.