Tíu mánuðir fyrir fjölda brota

Héraðsdómur Reykjavíkur dæmdi í dag tæplega tvítugan mann í tíu mánaða fangelsi fyrir bílþjófnaði, innbrot, þjófnaði og fyrir að aka bifreið í ein tíu skipti án ökuréttinda. Maðurinn játaði brot sín sem hann framdi að hluta til í félagi við annan mann á þrítugsaldri. Mál eldri mannsins voru hins vegar aðskilin frá máli þess yngri og því verður dæmt í því máli síðar. Með brotunum rauf sá sem dóminn fékk í dag skilorð sem hann hafði sætt vegna svipaðra brota áður en umræddur maður á þrátt fyrir ungan aldur all langan afbrotaferil. Meðal brota mannsins nú eru fjöldi innbrota í sumarbústaði þar sem skemmdir voru unnar og hlutum stolið. Bótakröfum eigenda sumarbústaðanna var hins vegar vísað frá dómi.