Tíu fíkniefnamál á Akureyri

Lögreglan á Akureyri hafði afskipti af tíu mönnum vegna fíkniefnamála í fyrrakvöld og fram eftir nóttu.

Mennirnir, sem eru allir um og yfir tvítugt, voru stöðvaðir við reglubundið eftirlit lögreglu. Var um neysluskammta af hassi og amfetamíni að ræða í öllum þessum tilvikum.

Tilkynning barst til lögreglu um fjögur leytið í nótt vegna slagsmála á tjaldstæðinu við félagssvæði íþróttafélagsins Þórs. Lögregla skakkaði leikinn en handtók engan. Lögregla segir engan sáran eftir handalögmálin.

Aðfaranótt föstudags voru þrír teknir af lögreglu grunaðir um ölvun við akstur og um hádegi á föstudeginum voru aðrir tveir ökumenn stöðvaðir fyrir sömu sakir.