Íbúar komust út af sjálfsdáðum

Eldur kviknaði í kjallara íbúðarhúss á Hlíðarvegi í Kópavogi um sexleytið í gærmorgun. Íbúar kjallarans urðu eldsins varir og komu sér út af sjálfsdáðum. Það sama gerði fjögurra manna fjölskylda sem býr á efri hæð hússins. Tveir voru fluttir á sjúkrahús vegna gruns um reykeitrun.

Að sögn talsmanns slökkviliðs höfuðborgarsvæðisins var eldurinn ekki mikill en talsvert um reyk. Reykkafarar fóru inn í kjallarann og var húsið reykræst í kjölfarið. Ekki liggur fyrir hvert tjónið er af völdum elds, reyks og sóts.