Slagsmál auglýst á netinu

Allt að fimmtíu unglingar fylgdust með slagsmálum tveggja pilta fyrir utan Háskólabíó um helgina. Myndbandi, sem sýnir slagsmálin, hefur verið dreift á netinu en þau voru skipulögð og auglýst þar í síðustu viku. Ruv.is sagði frá.

Samkvæmt lögreglunni í Reykjavík var hún ekki boðuð á staðinn. Lögreglan hefur haft spurnir af því að netið sé notað til að auglýsa slagsmál, en þá eigi hópar í hlut. Lögreglan hefur brugðist við slíku en yfirleitt hefur ekkert orðið úr átökum þrátt fyrir að auglýst sé á netinu og með smáskilaboðum.