Clint og Drottningin verðlaunuð

Kvikmyndin Letters From Iwo Jima eftir Clint Eastwood var valin kvikmynd ársins af Samtökum gagnrýnenda í Los Angeles, en þeirra árlega verðlaunaafhending fór fram um helgina.

Verðlaunin þykja gefa góða vísbendingu um hvaða kvikmyndir það verði sem lenda efst á blaði þegar kemur að því að velja Óskarsverðlaunin og því fygldust margir spenntir með. Letters from Iwo Jima fjallar um seinni heimsstyrjöldina frá sjónarhorni Japana, hún er næstum því öll á japönsku og var einnig tilnefnd sem besta erlenda kvikmyndin.

Það var kvikmyndin The Queen sem lenti í öðru sæti, en hún var einnig atkvæðamikil á afhendingunni og sópaði til sín fjórum verðlaunum allt í allt, meðal annars fékk Helen Mirren verðlaun sem besta leikkona í aðalhlutverki og Peter Morgan fyrir besta handrit. Það vakti mikla athygli að Letter from Iwo Jima hafi þótt besta myndin en í flokknum var einnig myndin FLags of Our Fathers, sem líka er eftir Eastwood og var eins og margir muna tekin að stórum hluta upp hér á landi.

Besti leikstjórinn var valinn Paul Greengras fyrir kvikmyndina United 93 og í öðru sæti var Eastwood sjálfur fyrir stríðsmyndirnar tvær. Óvæntasti verðlaunahafi hátíðarinnar var án nokkurs vafa leikarinn Sacha Baron Cohen, en hann var valinn besti leikari ársins fyrir persónu sína Borat, en verðlaunum deildi hann með Íslandsvininum Forrest Whitaker, en hann þykir skara fram úr fyrir túlkun sína á Idi Amin Dada í kvikmyndinni The Last King of Scotland.

Besta erlenda kvikmyndin var valin The Lives of Others eftir Florian Henckel von Donnersmarck, en kvikmyndin Volver eftir Pedrp Almodovar fylgdi fast á hæla hennar. Af öðrum verðlaunum ber að nefna kvikmynd Al Gores An Inconvenient Truth sem sigraði í flokki heimildarmynda og fjölskyldumyndina Happy Feet sem þótti besta teiknimyndin. Þess ber að geta að kvikmyndin Letters from Iwo Jima átti ekki að koma út fyrr en snemma á næsta ári, en forsprakkar Warner Brothers ákváðu í flýti að frumsýna hana núna í desember.