Gummersbach lagði Lubbecke

Fjórir leikir voru á dagskrá í þýsku úrvalsdeildinni í handbolta í kvöld. Íslendingalið Gummersbach lagði Lubbecke 27-21. Guðjón Valur Sigurðsson og Róbert Gunnarsson skoruðu 5 mörk hvor fyrir heimamenn, en Þórir Ólafsson komst ekki á blað hjá Lubbecke.

Göppingen lagði Melsungen 27-24 og skoraði Jaliesky Garcia 2 mörk fyrir Göppingen. Logi Geirsson og Ásgeir Örn Hallgrímsson fóru mikinn í liði Lemgo sem vann Wetzlar á útivelli 33-27. Logi var markahæstur með 8 mörk og Ásgeir skoraði 5 mörk. Loks vann Nordhorn auðveldan sigur á Pfullingen 29-21.

Gummersbach (44 stig) skaust í annað sæti deildarinnar með sigrinum, en topplið Kiel (44 stig) og Flensburg (42 stig), sem er í þriðja sætinu - eiga tvo leiki til góða.