Mikil mengun vegna slyssins

Lögreglan á Húsavík og Akureyri lokaði margra ferkílómetra svæði af í Ljósavatnsskarði laust fyrir klukkan níu í morgun vegna sprengihættu, sem skapaðist eftir að fulllestaður bensínflutningabíll valt á þjóðveginum og þúsundir lítra af bensíni runnu úr geymum hans.

Bíllinn var að koma frá olíubirgðastöð Olíudreifingar á Akureyri með 20 þúsund lítra af bensíni á tanknum og tíu þúsund lítra í tanki tengisvagns, þegar hann valt á veginum við Stórutjarnir í Ljósvatnsskarði, laust fyrir klukkan níu í morgun. Grétar Mar Steinarsson, forstöðumaður dreifingarsviðs Olíudreifingar, segir ekki liggja ljóst fyrir hvað gerðsit, en sennilega hafi bensínflutningabíllinn verið að mæta öðrum bíl þegar hann valt. Bílstjórinn er ekki talinn alvarlega slasaður, en hann er töluvert lemstraður eftir veltuna, og var hann var fluttur á Fjórðungssjúkrahúsið á Akureyri til aðhlynningar. Í tilkynningu frá Olíudreifingu segir að verulegt magn af bensíni hafi lekið úr tengivagninum en minna úr tanki bílsins. Tuttugu þúsund lítrar voru í tanki bílsins en tíu þúsund lítrar í tengivagninum. Bíllinn liggur á hliðinni á veginum og lokar honum en tengivagninn er utan vegar. Lögregla frá Húsavík og Akureyri ásamt slökkviliði frá Akureyri og úr Þingeyjarsveit eru á vettvangi til að koma í veg fyrir eldsvoða. Bíllinn er þversum á veginum en engin hjáleið er framhjá vettvangi. Talsmenn lögreglu telja að hægt verði að opna veginn um klukkan tvö, en töluverð röð bíla myndaðist vestan meginn slysstaðarins í morgun. Olíudreifing hefur sent dælur og annan nauðsynlegan búnað frá Reykjavík og Akureyri á slysstað til að dæla bensíni af tönkum bílsins og úr umhverfinu. Ljóst er að töluverð mengun hefur orðið vegna slyssins.