Húsaleiga hækkar til muna

Húsaleiga hefur hækkað til muna á þessu ári. Leiga á tveggja herbergja íbúð á höfuðborgarsvæðinu hefur hækkað um 10-20 þúsund krónur að meðaltali frá því í ágúst í fyrra.

Biðlistar eru langir eftir leiguhúsnæði og eftirpsurnin meiri en framboðið. Meðalleiguverð tveggja herbergja íbúða á Reykjavíkursvæðinu er nú um 70-80.00 þúsund krónur á mánuði en í fyrra var meðalverðið 50.000-60.000 kónur.

Á heimasíðu Stúdentamiðlunar er 76 fermetra húsnæði auglýst á 95.000 kr. á mánuði. 60 fermetra íbúð er auglyst á 85.000 krónur á mánuði og 16 fm herbergi auglyst á 35.000 krónur á mánuði. Hanna María Jónsdóttir, rekstrarstjóri Stúdentamiðlunar Háskóla Íslands segist vel taka eftir hækkandi leiguverði og segir það bitna á námsmönnum sem jafnvel eru að borga yfir 100.000 krónur fyrir þriggja herbergja íbúð. Sérstaklega sé slæmt ástand áberandi hjá erlendum stúdentum sem engan veginn geta borgað uppsettar upphæðir. Segir hún nemendur reyna að finna meðleigendur í meiri mæli en áður og kemur það fyrir að erlendir stúdentar deili jafnvel tveir saman einu herbergi.

Eins og fram kom í fréttum NFS í gær setja bankarnir nú mun strangari lánsskilyrði fyrir íbúðalánum en áður. Þeir hafa lækkað prósentu af markaðsvirði, auk þess sem hámarkslán hafa ekki haldið í við hækkanir á markaði. Þá hafa vextir af íbúðalánum hækkað þannig að lánin eru orðin dýrari og mikil verðbólga snar hækkar nafnvirði lánanna. Allt þetta hefur slegið verulega á eftirspurn og fækkað þinglýstum kaupsamningum til muna.